اوعى تكتمى فى صدرك الكلام.. زيحى من فوق صدرك الغلام.. شدى حيلك اتحركى كسرى الرخام.. سيبك من إمبارح وقولنا وقال.. ولعى شمعك بالعسل والميه.. احلفى إن المحال ح يكون حقيقة.. وإن السنين الحلوة بكرة جية.. وأرضك راح تفضل هادية ورقيقة.. اتكلمى سمعينى صوتك بالغنى.. انسى اللى ذلنى فيك وحرمنى الهنا.. أهو غار يا حبيبتى ودا كان المنى.. انسية يا حبيبتى وفوقى لى أنا.. أنا عمرى ضاع منه تلاتين سنة..
واللى باقى مش فى إيدى أنا.. الحقينى يا حبيبتى فرحينى كام سنه.. وحشانى أوى طعم الحرية هنا.. ساكتة ليه اتكلمى قولى حاجة.. ناوية تضيعى عمرى فى حواديت.. ولا إنت لسه يا غالية محتاجة.. زهرة شبابنا تشوفيهم فى توابيت.. كفاية يا أمى دمع الأمهات جف.. حنى بقة وخليك بجد أمى.. نفسى أشوف جرح واحد خف.. ولا أشوف فيك ولا واحد أمى.. كفاية خلينى مصدق إن الغلام.. هو اللى كان السبب فى اللى كان.. بدل ما أغير رأيى وأقول يا سلام..
راح الغلام.. ليه فضل اللى كان.. اتكلمى عن خريطة المستقبل.. مزقى خريطة الماضى اللعين.. اثبتى إن شبابك واعى مش أهبل.. وكان صح يوم ما هد نظام ملاعين.. اتكلمى قبل ما يشمت فينا الفلول.. ويشوفونا الريح ويشوفوكى بلاط.. أرجوك فكرى بسرعة ف حلول.. واسقينا كاس وداع الانحطاط.