الله عليكى يا مصر نخلك طرح عالنيل
ثورة شباب العصر غنت لنا المواويل
ثورة شباب العصر كتبت فى كراسى
الظلمة ليهم يوم والمظلومين بالكوم
يا دعوة المظلوم المر من كاسى
الله عليكى يا مصر يا أم التاريخ مكتوب
ثورة شباب العصر بصمت على المكتوب
رفعت لنا راسنا دستور يا حراسنا
يا أهلنا وناسنا حتى التراب منهوب
الله عليكى يا مصر لما ابتديتى تفوقى
ثورة شباب العصر جريت أوام فى عروقى
خلت كبير وصغير يحس إنه اتغير
ومستعد يغير علشان يا مصر تروقى
الله عليكى يا مصر والمخلصين جاهزين
ثورة شباب العصر شطبت على الفاسدين
والقلب فى التحرير والورد فى التحرير
وبدأنا فى التغيير 30 سنة صابرين
الله عليكى يا مصر الله على الحرية
ثورة شباب العصر ثورة صحيح شعبية
ومصر هيه القصد والرك عالنية
والاختلاف موجود للمصلحة الوطنية
الله عليكى يا مصر يا معلمة الدنيا
ثورة شباب العصر وقفت لها الدنيا
مبهورة مِ اللى جرى بحضارة ومقدرة
يا حلوة يا صغيرة لسّاكى أم الدنيا