نفسى الدولة تحس بقيمتى وتزيد أجرى اللى بيحرجنى.. لو بوعود صادقة تطمنى وتنسى الكادر اللى بيهدمنى.. والترقية تعود من تانى والتسوية تيجى تنصفنى.. وكل مناسبة يفرح قلبى بشهر إضافى كده يسعدنى.. وأطلع أجرى من مدرستى ولا أروح درسى ولا أهين نفسى.. وابنى حبيبى يعرف شكلى ويقول بابا وينطق اسمى.. ولا أكدبش عليه ولا أقوله بكرة هنخرج خد هات شيبسى.. وألقى مكافأة زى الجامعة آخر السنة كده تفتح نفسى..
وأطلع رحلة ويا نقابتى أو كده مصيف يسعد عيلتى.. وأشوف نادى الشاطئ فاتح مش متأجر ولا بيغيظنى.. ونفسى وزيرى ما يبهدلنى بعد ما أشيب أو يكبر سنى.. وما يودينى ملاحظة بعيدة ولا على تختة ده ينيمنى..
وإذا الضغط هناك بهدلنى المستشفى هناك تقبلنى.. ولو معاليه كده عين ابنى كل الناس هتحس بقيمتى.. ونفسى معاشى يعلى شوية علشان أقدر أظبط عيشتى.. وأملى مكافأة آخر الخدمة تعلى وأجوز بيها أنا بنتى.. وأطلع حج أو أطلع عمرة وأفضى لربى اللى هيغفرلى.. وأشوف مصر حبيبتى بتعلى ويبقى الفضل لصبرى وعلمى.
مدرسة مجمع سيدى بشر- إدارة المنتزه
osmanbehoor@yahoo.com