سيادة المخلوع.. ارجعلنا.. مش انت واحد مننا.. وعمرك فى يوم ما سرقتنا.. ولا خدت مليم مننا.. ما تيجى طب ترجعلنا.. تقعد بأهلك وسطنا.. وغداك يا سيدى عندى أنا.. رز وبطاطس مسرطنة.. لحمة؟؟.. مفيش من سنة.. فاكهة.. تعيش أنت وأنا.. والشاى.. بآخر معلقة م السكر اللى كان عندنا.. اشرب وفوق وركز بقه..
علشان نكمل حكينا.. ما تيجى تسمع حكمنا!!
أفكّرك ولاَّ انت فاكر زينا.. قطار اتحرق من كام سنة.. وغازنا اللى طار من أرضنا.. لعدونا.. وعبارة مِ اللى بيغرقوا..!!
غرقت فى عرض البحر وراحوا أهلنا.. والجانى فلسع مننا.. ومركبة بأحلى شباب من إيطاليا بييجوا غرقانين.. والقرش ياكل لحمنا.. اتغربوا واتبهدلوا.. لما الفساد طال كل حاجة فى أرضنا.. بعد ما نهشت لحمنا وولادك مصوا دمنا.. قولت إيه يا عمنا.. يا تُرى ترضى بحكمنا؟؟!
إمبابة