كل ما أفتّش فى دفاتر قلبى.. ألقى حبك.. جذوره خضار.. وكل ما أحاول أنسى هواك.. أحاول أجرى بعيد أنساك.. ألقى جذور طلعت أشجار.. بأحاول أحاول أبعد عنك.. ألقى الشوق بيشعلل نار.. حب معشش فىّ وساكن.. محتل فى قلبى كل أماكن.. قمر الليل وشمس نهار.. أحاول أهرب منه بعيد.. ألقاه يكبر تانى ويزيد.. يلقى كل قواعده حديد.. قصر حقيقى وأجمل صرح.. حافر جملة بقلم الفرح.. مكتوبة على كل جدار.. محقونة فى كل وريد.. مش ممكن حبك فى يوم ينهار.. إنت الحب الصافى.. إنت الحضن الدافى.. إنت الأم.. احنا بنقسى وهى تضم.. كل ما نبعد ليك نتشد.. نلقى الإيد بالخير تتمد.. والحب بيعزف فينا أوتار.. أنت ترابك مسك يفوح.. ريحته معانا منين ما نروح.. إنت القلب وإنت الروح.. والوطن الطاهر ليه مرار؟
mrradvo@gmail.com