«مخنوق»
مخنوق.. ونفسى أقول كلام.. فعل اللئام.. يا حبيبتى مش «هيهمنا».. وإن حاولوا يطفوا شمعنا.. برضه مش هيهزنا.. وحياة هواكى.. وحبى ليكى.. وعشقى ليكى.. اللى جوه عروقى دايب.. حالف أولع ألف قنديل للمحبة.. وألف شمعة ف ايدين الحبايب.. يا حبيبتى قلبى دايب.. قلبى مفطور م الألم.. ع اللى جرالك.. يا حلوة عمرى ماشفت زيك.. فى جمالك.. مقهور عليكى يا حبيبتى.. ونفسى أبكى.. نفسى أشكى.. نفسى أقول للدنيا وأحكى.. أحكى قصة حبنا.. وأحكى جمالك.. وأحكى نضالك.. وأحكى صبرك واحتمالك.. وأسأل وأقول.. اشمعنى هى تتئذى؟.. وهى أجمل ما خلق.. زعلان عليكى.. والفرح منى اتسرق.. مخنوق عشانك.. وكل العاشقين.. زيى عشانك.. مخنوقين.. حتى السما والأرض.. برضه مخنوقين.. حتى الشجر والزرع.. برضه مخنوقين.. صوت الجوامع.. مخنوقين.. جرس الكنايس.. مخنوقين.. مين عليكى ياحبيبتى مش زعلان؟.. مين عليكى يا مصر.. لسه مش حزين؟!
خالد أمين عارف
***
يا كنيسة القديسين
يا كنيسة القديسين أحلف دول شياطين.. اللى عملوها لا ليهم ملة ولا دين.. ده حنا جسد واحد بالحب متعاهدين.. بنقسم اللقمة سوى نصارى ومسلمين.. برهومة علمنى أكتب باسم الله.. جرجس علمنى أرسم هلال محلاه.. فى طابور الصبح لمصر نغنى.. هيه تاجنا وهيه الروح والجاه.. الحب اللى بيجمعنا يا محلاه.. الوطن للكل والدين لله.. حتى غيطانّا بزرعها متعانقين.. فى ضل شجرها تلاقينا قاعدين.. نغزل حب ونشرب ودو فرح وجد.. جنود الرب علينا دايما شاهدين.. أمانة تمسحى دموعك.. وحياة ربك ويسوعك.. قيدى من تانى شموعك.. دقى أجراسك فى ربوعك.. شايفة المآذن والحزن اللى ماليها.. محمد رسولنا بالحب معليها.. على حب الناس ربانا.. دعوة سلام ماشيين عليها.. اللى جرى وجعنا كلنا.. كتر همومنا وزود حزننا.. الدم اللى سال ده دمنا.. المطلوب الغالية مصرنا.. وحياة الطاهرة البتول.. الغدر منا ما راح ينول.. وحنفضل سوا نقول.. مصر أمان على طول.
إبراهيم إبراهيم بصلة
ديوان عام محافظة المنوفية
***
أفكرك
أوعى مرة ف يوم تصدق.. إنى عاوز أفجرك.. طب أفكرك فاكر الدمعة ف عينيك.. وإحنا لسه صغيرين.. لما يومها قالوا ليك.. قوم عشان ده درس دين.. إنت قلت لأ ده فصلى يبقى أسيبه ليه.. وأصلى.. أفرق إيه.. ع الموجودين.. كانت حكاية، وجه أبوك.. يومها غلبوا يفهموك، إن جنب الاسم خانة، فيها شىء، اسمه الديانة لسه عاوز أفكرك؟؟ كنا فين الصبح بدرى؟؟ كنا واقفين فى الطابور.. فين رغيفك من رغيفى.. والله ما درى هى أصلاً عجنة واحدة للفطور.. نفس جريك زيه باجرى.. حتى أجرك هو أجرى.. بالحوافز والكسور فين مشاكلك من مشاكلى.. مانت شكلك.. زى شكلى.. فين هدومك من هدومى.. فين همومك من همومى.. همنا واحد عمومى.. واللى قارفنى فى يومى هو نفسه مكدرك.. لسه عاوز أفكرك؟؟ أما قالوا الحاجة غليت هيه نفس دمانا غليت قومنا نشتم ف الحكومة زاد صراخنا ويومها دوخنا.. لما خدنا علقة سخنة.. ضربة واحدة بذاتها شومة.. شىء جرحنى وعورك لسه عاوز أفكرك؟؟ كنا فين من ساعة؟؟ فى المدرج محشورين كلنا بنفس الفانلة.. أى ملة وأى دين وأما جت هجمة علينا قومنا شبكنا ف إيدينا وكل واحد قلبه طب.. والقلق وحد كياننا والتقينا فوق لساننا.. دعوة واحدة استر يارب
دكتور