مريم أخت مريان.. أصحاب فاطمة بنت الحاج عثمان.. أصحاب من أيام مدرسة عثمان بن عفان.. وفى كل عيد مع بعض فى كل مكان.. ورأس السنة كان عيد المفروض يكون سعيد لوطن شقيان.. راحت مريم ومريان كنيستهم فى أمان.. علشان يحتفلوا بالعيد زى كل عام.. وانتظرتهم فاطمة فى دكان والدها اللى فى قلب الميدان.. خلصت صلاتهم وخرجوا قوام.. خطوة وبعدها خطوة وسكت الكلام.. واتحولت البسمة لبركان.. ونار بتحرق فى الأجسام.. وغدر انفجر يحطم معانى السلام.. صرخت مريم على مريان.. شافت دمها على الجدران.. وأشلاءها فى كل مكان.. بكت مريم على مريان.. دم مريان كان شاهد عيان.. على تخلف تفكير بعض بنى الإنسان.. بس إحنا هنفضل بلد سلم وسلام.. وكلنا إيد واحدة ضد الإرهاب فى كل مكان.. مش هيفرقونا ويصبح الوطن أوطان.. مسلم ومسيحى ده الكيان.. دين لله ووطنا لكل إنسان.. وهتفضل مصر فيها فاطمة صاحبة مريان.. وجرجس صاحب عبدالرحمن.