يا ولاد بلدى اصحوا بقى.. يا ريت تسمعوا الندا.. بلدنا الغالية مقصودة.. من «ولاد العم» مرصودة.. الأعصاب نار ومشدودة.. والدنيا نشوفها مسدودة.. نضرب ونحارب بعضينا.. تفرح «الجارة».. اللدودة!.. «الهلال» يحارب «الصليب».. يسود اللبن الحليب.. نتوه فى ظلام الليل الكثيب.. «والنجمة السداسية» أحزانها تطيب.. «الصليب» يحارب «الهلال».. وعلى مصر تنهد الجبال.. يتحقق الحلم المحال.. و«نجمة داوود» تبقى تربى العيال.. زمان عملوا حرب الطوائف فى لبنان.. فتنوا المسلمين والصرب فى البلقان.. وفى اليمن سلحوا المتمردين «الحوثان».. دلوقتى ابتدوا تقسيم «السودان».. «بتوسوس» «أمريكا» تضرب إيران.. وفى «ياما» حاجات كمان.. يا ترى هاتحسوا بألم؟..
لما يشيلوا النصر من العلم.. ابقوا افتكروا الوطن.. اللى اتظلم.. بإيدين ولاده.. وابكوا بدموع الندم.. على وطن ضاع واتباع حتى ترابه.. وطن شمسه نورت الأمم.. بقى ظلام بعناد وجهل «قلة» من شبابه.. لسه الأمل موجود.. الحكمة للعقول تانى تعود.. وتتلون وتتعطر الورود.. وبلدنا للعالم ترجع تانى تقود.. بوحدتنا هاترجع تانى أمجادنا.. و«أكتوبرات» تانية تيجى لولادنا.. بالأفراح وبالانتصارات تكتر لينا أعيادنا.
سوهاج