قررت أكون هتاف مع الهتافين.. قررت أكون كداب مع الكدابين.. وكل السيد ما يتكلم كلمة أهتف وأقول آمين.. وأبتسم متظاهر بالرضا والامتنان.. لأنى وباختصار مش طايل جنة ولا نار.. وأنا شايف قلوب الناس طالها الدمار.. وحقوق مالت للاندثار.. والبيض بيهجر العش.. ورياح بتلضم ذرات التراب والقش.. تاهت الملامح فى الوش.. وانطفا الحنان فى قلب الإنسان.. وبلدى فركة كعبها فى الأرض.. وكشفت ساقيها لهتك العرض.. والضد قابل الضد.. بين حيطان الوطن.. مرحب يا صوت الحرية المتثقف.. بالثقافة الغربية رفيعة المقام بالشجب.. ازعق يا ابن النهاردة فى وش أبوك.. وقول له يا أبا عيب.. اتعلم من سواد راسى لو معلمكش الشيب.. انطق يا ابن الجيل الجديد.. وأخرس صوت العديد فى الشعب.. وابنى وشيد فى الحى البعيد.. وانسج التوب للعيد.. واتمنى تكون إنسان.. قبل ما يفوت الأوان.