ركك ع اللى سيّب حبله ع الغارب.. لكل من هب ودب.. وياريته.. كان عاجب.. اللى يطلقك من راحتك.. وأنت من كعانك شارب.. راجل إنت ولا مفيش فى وشك شارب.. ليه سايب اللى يزوء.. واللى على راسك يدق.. بميت شاكوش مسنون.. ووراه منين ما يكون.. واللى ف زحام الأرض إدالك كتف.. والكدمة مش بتخف.. ما تقول وقوله كفاية.. وعن دماغى خف.. ليه دايق إنت المر، وتقول عسل بيشر.. على نفسك كدبت مرة.. والباقى جُم بالمرة.. تستحمل ليه يا صاحبى.. متعيش ودمك حر.. تقول عليه ليه سيدك.. وقصادك ليه بتهُر.. إديت للكل فرصة.. يعمل فيك مابداله.. وتدافع عنه حق.. والعلقة تخدها بداله.. قوم واطرد اللى استعبدك.. وف بؤجه لم عزاله.. مين غيرك.. إنت يردلك.. ومين حيرضى يبص لك.. وإنت بتقول وماله.. رافع علم سلبيتك.. وبتهتف ليه ب جلاله.. ما كفاية من فيك بحلقوا.. غمزوا ولمزوا واتريقوا.. قالوا الجدع مسكون.. ولا عبيط مجنون.. كون إنت مين ما تكون.. بس المهم.. كفاية