هلىّ علينا وافردى بوزك.. دحنا سبب شهرتك وبروزك.. أين أنتِ أيتها اللحمة.. وكيف السبيل إلى كندوزك.. بتزيدى زيادة غير مفهومة.. بتلو.. ضانى.. أو مفرومة.. صحيح موجودة فى الدكاكين.. بس الجيوب فاضية ومخرومة.. يا لحمة دا بينا ملح وعيش.. وعشرة طويلة ما بتتنسيش.. تجمع ما بينا مناسبة عيد.. والود ودى الطعم يعيش.. سعرك يا لحمة من الموانع.. ومرطرطة فى كل الشوارع.. راعى إن فيه بينا خلايق.. بتحلم بواحد شوربة كوارع.. تغور العوزة وتغور المذلة.. خلى الغدا رز وبسلة.. سنين بناكل (لسان) عصفور.. إيه يعنى بفتيك وكباب حلة.. ورينى عزمك لو كنت ناوى.. ترفض بشدة تاكل كلاوى.. والكبدة محتاجة لإرادة.. وإياك تُغرك العكاوى.. جرالنا إيه ما الصحة عال.. يا دوب ناقصنا راحة البال.. لا حد نام من غير عشا.. ولا حد فَلَتْ من العيال.. ربك بيرزق صبح ومسا.. ده لقمة فاضية وده متغمسة.. وده رغيف فيه لحمة ورز.. وده موزة حمرة ملبسة.. يا لحمة خفى إحنا بتوعك.. راضيين بريشك وضلوعك.. حزب الغلابة له مطالب.. يفرح قُريب برجوعك.. جانى عريس كده فى الزحمة.. وطلب منى البنت رحمة.. واتفقنا علينا الجهاز.. وهوه يا كبدى عليه اللحمة!