خواطر حاج

الفرح فى القلب زاد غطى على الأحزان

والدنيا متزوقة والكون سعيد فرحان

وكل شىء فى الوجود بيلبّى ويكبّر

واحنا فى رحاب النبى فى ضيافة الرحمن

            ■ ■ ■

فى مسجد المصطفى فى مدينة الأنوار

عشنا الصفا والوفا والحب ليل ونهار

وفى رحاب المقام روضة من الجنة

الله يا حب النبى ياما فيك من الأسرار

            ■ ■ ■

وفى مكة نلنا المنى لما رأينا البيت

تكبير وتهليل ومن شدة سرورى بكيت

ودعيت لرب العباد يغفر خطايانا

وطفت وسعيت وفى رحاب المقام صليت

            ■ ■ ■

سبحانك اللهم جمعت المسلمين ع الحب

فاتوا ولادهم وأوطانهم وهان الصعب

بيسبّحوا ربهم وبيطلبوا الغفران

وبيركعوا ويسجدوا والحب نوّر فى القلب

            ■ ■ ■

رغم اختلاف اللسان والشكل والأجناس

ملايين كتير م البشر بالروح وبالإحساس

متجمعين كلهم على كلمة التوحيد

بيأدوا فرض الإله ويناجوا رب الناس

            ■ ■ ■

وأنا معاهم بأدعو الواحد المعبود

يغفر لنا ما مضى فى يوم عظيم مشهود

ويتوب علينا ويهدينا لطريق الخير

ويتم فضله علينا بالكرم والجود

            ■ ■ ■

اقبلنا يا رب واجعل حجنا مبرور

وارحمنا واغفر لنا أنت رحيم وغفور

واكتب لنا عودة لرحاب الحرم والبيت

واقبل دعانا واجعل حجنا مبرور

عضو اتحاد الكتاب