مالك يا حلوة قايمة شرار؟!.. بقيت أميرة فى سوق الخضار.. قلنا تلاتة إمكن تروقى.. ستة وسبعة دا حاجة مرار.. مالك يا حمرة ناسية الحبايب؟.. وإمتى هتيجى تزورى الديار؟.. ولاّ نويت تقسى علينا.. كإنه معارك بينا وتار.. عايزة تقولى قيمتى كبيرة.. مانجة طماطم دا نفس المسار.. دا انت يا قوطة جوا قلوبنا.. أبداً مكانك ما يسكن خيار.. جايز وإمكن قالوا «مجنونة».. نقدم ونبعت إليك اعتذار.. غندورة بندورة بلاش الأسية.. طبيخنا بصلصة بيصبح فيشار.. بنخطب ودادك يا ريتك ترقى.. يا ما عرايس وسابها القطار.. موسم يا شاطرة ولازم تعودى.. ويشبع بأكلك كبار وصغار.. مهرك يا حلوة غالى علينا.. لحمة وفاتورة وبأدفع إيجار.. يا ريتك يا حلوة تخفى شوية.. مساكين معانا عيالنا كتار.. نسيوا عيالنا شكل السلطة.. صبح وليل بياكلوا بصار.. تعالى يا حمرة يا حلوة نتصالح.. ويصبح بينا وبينك عمار.. عرفنا يا حلوة قيمتك حقيقى.. مطبخنا بدونك دليله يحتار.. روقى يا طمطم شايفة ظروفنا.. بلاش القساوة وتُقْل الهزار.
marrady0@gmail.com