لو يوم فهمت اللى حاصل للبشر والناس.. فى مصر تفقد صوابك ويصيبك الوسواس.. وكل شخص فى بلدنا عامل فيها فرهود.. وفى الحقيقة إنه جاهل فهلوى ومحتاس.. لا هو فاهم اللى جرى واللى حيجراله.. ولا اللى حينوب ولاده بعدما ينداس.. تحت الديون الثقيلة وهمها المكتوب.. وبحكم فاسد نهايته للوطن إفلاس.. ولو عرفنا السبب فى الدين وخدماته.. نلاقيها خطة قديمة مخطط لها خنَّاس.. من بنك دولى وصندوق للنقد وخلافه.. وعُمَلا جوه الوطن ما عندهم إحساس.. إلا برصيدهم من الأموال فى سويسرا.. أو لما نكسب فى كورة أو نجيب الكاس.. وبعد كل انتصار فى الماتش والدورة.. إنت بتهتف وهم بينصبوا البرجاس.. وده عشان الكبار يصير لهم هيبة.. والخيبة تبقى نصيبك إنت والكناس.. ودخلنا القومى فى مصر متبعزق.. فيه اللى ياخد قفف واللى يادوب قرطاس.