برغم الأوضاع يا بلدينا.. سوق الجواز رايج فى حوارينا.. وله محامين وسماسرة.. والعرسان شيوخ مستوردة هلكانه، والعرايس بنات قاصرة!!.. ترمى بياضك بالريال والدينار، وورقة جواز بكام ساعة، تلقى البنات بين إيديك جاهزة!!.. فى الكفور والعزب مابقاش للجنيه قيمة.. لكن عملة الخليج تنولك إيد الكريمة!!.. و«كريمة» يا ولداه لسه بتلعب فى الحارة.. يخطفها اللى ما يتسما دوغرى فى طيارة!!..
يقولولها يا بختك يا بنتى هتشوفى العز اللى ما عمرنا شفناه، هاتكلى وتشبعى فراخ ولحمة مشوية.. وتبقى الفلوس معاكى ومعانا شىء وشوية!!.. البنيه يا ولداه تايهه ومش فاهمة حاجة.. فاكــرة الطيارة لعبة تطلع بيهــا فى العــالى.. لكنها نزلت منها هناك ع القصر طوالى.. وكل الحكاية كانت أوضة نوم.. قامت ونامت وعاشت فيها كام يوم!!.. فى كل ساعة تشوف العذاب كله.. وكل اللى عرفته من الجواز ذله!!.. ماحد خفف عليها مللى بتقاسى.. ولا حد يمسح دموعها ويواسى.. شوية ولقت نفسها راجعة فى طيارة.. وفى المطار شافت أهلها بيركبوا أختها طيارة.. يا ميت خسارة.. يا ميت خسارة عليكم يا بنات مصر!!.. ولسه بنقول: زغرتى يا مصر.. عشان البنات اتجوزت!!