لازم تدوق
مـــــــدام دُقت الفرح لازم م الحــــــــزن تدوق
وكل ما تبعد عن ربنــــــــا تلقىَ نفسك مخنوق
العبد بينسىَ ربه والخالق مــــا بينسىَ مخلوق
ومـــــــــــدام معاك ربنا هتحلى معاك وتروق!!
ما عدش ينفع
يا اللى أخدت الحـــــــــــــــــــــــرام وكان الحلال مكفيك
هـــــــــــــو ده طمع ولا جشع ولا الســـرقة طبع فيك
ومــــــــا عدش ينفع ندم ويامــــــــــــــا الزمن هيبكيك
ولــو سألوك ليه عملت كده قول الشيطان ضحك عليك!!
هتعمل إيه؟
يا اللى هبرت هبرة زودت بيها مـــــــــــــالك
وكنت فاكــــــر ساعتهــــــا إنك ريحت بالك
وانكشفت وصبحت حزين والكل يسأل مالك
مـــا فكرتش هتعمل إيه لـو ملك الموت جالك؟
دنيــــا
استخدمنــــــــــــا صحتنا غلط
وضعفنـــــــــا خلاص وشيبنا
كنـــــــــا بنقرقش الظــــــــلط
دلوقت عايشين ع الجبنــــــــة!!