أنا مش مرمى على التراب.. أنا نايم على دراعك.. أنا مش مربوط بالحبال.. أنا مش متحمل وداعك.. أنا حاضن ترابك بكتافى.. أنا بجمع حصى أوجاعك.. أنا عايز بس تعرفى، مين اشتراكى ومين باعك؟!.. كنت خلاص راجع لدارى.. ومسلم سلاحى ومسلم مخلتى.. كنت بعد ورد الخطاوى، وانتى كنتى لسه فى عهدتى.. كانت لسه حروفك غناوى.. بسمعها نغم يهوّن غربتى.. طلع البارود قبل العصارى..
يسقى حدودك بدمى ودمعتى!!.. أنا مش آخر شهيد يا رفح.. أنا لسه أول العنقود.. أوعى تقولى الكيل طفح.. ده لسه الطريق مليان سدود.. إن كان يوم ربنا سمح.. إنك تضحى وتوفى العهود.. لازم بكرة تشوفى الفرح.. ودم شهيدك يحمى الحدود!!.. يا أم البطل يا أم الشهيد.. ابنك عريس السما زفته.. ابنك اتولد من جديد.. يوم شهادته يوم دخلته.. وعروسته معاه وكان سعيد.. وعلم مصر قميصه وبدلته.. وصل داره فى المواعيد.. والملايكة فى السما استقبلته!!
- القاهرة