مراتى عملت علىَّ «تمرد».. وقالت عايزة تركِّب تكييف.. وأنا كمان عملت «تجرد».. وقلت كفاية وبلاش مصاريف!!.. قالت الحر الصيف ده ولعة.. اشتريه إن شاالله نجوع.. قلت الناس منورة شمعة.. والكهرباء بتقطع بالأسبوع!!.. قالت طيب هات لينا كولدير.. يسقع لينا الميه شوية.. قلت لها كفاية بقى تبذير.. وسد النهضة قطع المية!!.. قالت مشروع النهضة بكره جاى.. وإن شاالله يعمل إنجاز.. قلت المشروع ده فى الباى باى.. لأنه قايم على لمبة جاز!!
وقلت لها أنسى المشروع ده بالمرة.. والكلام كله طلع أستروبيا.. والمشروع خلاص اتعمل بره.. والرئيس افتتحه فى إثيوبيا!!.. قالت الدنيا اسودت فى عينية.. عيشتنا سودة فى كل مكان.. قلت لها أسكتى ياختى شوية.. أحسن يتهموكى بازدراء الأديان!!.. قالت أنا هولع خلاص فى نفسى.. هات لى معاك جركن بنزين.. قلت يارب ده كان نفسى.. بس مفيش بنزين تمانين!!.. قالت نبيع أملاكنا ونهاجر.. ونعمل بره أى استثمار.. قلت قبل ما نركب ونسافر.. هنلاقى فى المطار ضبط وإحضار!!