يا بياعين الدجل سوق الدجل ولى.. ياما علينا حجل والعبرة فى الغلة.. طب ليه تخلوا الدجل يرسم خطاوينا.. من عهد مينا وفينا قلة منفلة!.. يا بياعين الدجل رفقاً بجهل الراس.. تنزل ماتطلع وتلقى العلم شربة كاس.. الزفة دفة وفركوشنا مخاوينا.. وإحنا اللى جينا برجلينا لإيد تتباس!.. يا بياعين الدجل خوف الدجل خوان.. عمال بيرجف ويخسف م البشر ألوان.. وبسور نكلبش عقول العلم والإنسان!.. يا بياعين الدجل هاجر دجل بكين.. والهند من حظها ترمى عليه إسفين.. الكل طالع وليه ننزل ننادى عليه.. اللى مخاوى أكيد ناوى أحد واتنين!.. يا بياعين الدجل نور العلوم هيثور.. والمستخبى هيعلن كشفه للمستور.. كيمياء وتكنو وراية العلم هتهفهف.. والحلم يهتف ضد المخدوعين بالزور!