كداب وكل البلد عارفة إن ده كداب أيامه سودة وقرف ومزفتة بهباب
مين كان يقول إن ده يعمل كده فينا وإزاى رضينا بكده أو زى ده يتساب
يقطف زهور البلد وردة ف ياسمينة والكل من قهرته يفضل يسف تراب
عزبة أبوه أصلها قشقشها للآخر ووكالة من غير ولا صاحب ولا بواب
لأ واللى زاد البلا فى المشهد الساخر الكل ماسك لنا دفتر وكشف حساب
يحسب علينا النفس فوق النفس كاتم لو قلنا آه تتحسب ويسجل الأتعاب
أصل العروسة بلا دبلة ولا خاتم صامت وفطرت بصل لها اتفتح له الباب
قال إنه شاطر حسن جاهز ومستنى صامت وفطرت بصل لها اتفتح له الباب
شرط إن لون شعرها لا يبان ولا تغنى ءلا يتسمع حسها ولا رنة القبقاب
طمعان ينول الرضا بس الرضا من مين ومنين نجيب الرضا ولا الرضا يتجاب
مصر العروسة الجميلة زينة الحلوين لو طرف شالها اتلمح يتجننوا الخطاب
صيادها لابد لها يمكن بسنارة يخطف عروسة بلا شبكة وكتب كتاب
فى الزفة ساعة الفرح لازق ورا ستارة وقعت فى حجره العروسة جتله ع الطبطاب
قالوا اللى يرفض كده مش منّنا وجاحد قطر المصايب وصل بيحمل الركاب
عتريس وشاطر حسن صورة لشىء واحد وفؤادة رح تشربه لو تشربوا الأنخاب
zizonour@yahoo.com