سبع أرواح
ثورتنا زى القـطـط ليـها سـبع أرواح
وحماســــها دايماً هيفضل عـطر ونور فـواح
دا شبابها وهبوا دمهم لأجل مطالبها
واللى بيلعب عليهم جايـله يوم ينزاح!
د. توفيق ماضى
أكســيد
إحنا حنرحل أكيد وكـل شىء بأوان
وبعـد عمر طويـل أو النهارده الآن
وعشان كده أعمل حسـاب دا اليوم
وأبعد عن الظلم وأعدل بين بنى الإنسان!
م. منصور عبدالعال عبدالله
الحدائق المركزية - الإسكندرية
قالوا لنا
قالوا لنا فيه مشروع اسمه النهضة
أتاريه كلام فى كلام وخوته ومناهدة
والشعب بلع الطعم داخل على مجاعة
فراحوا للصندوق عملوا معاه معاهدة!!
يحيى العجماوى
مش قـــادر
طول عمرى مشغول بهم الغير وناسى همى
وسط الهـموم كلها فيه هـم ألمـنى
همك يا مصر كبـر وفاق الحد
بصراحة مش قادر أصبر على اللى دابحنى
ناجى الغيطى