يا عم «باسم» كفاية الرئيس زعلان.. لزمتها إيه المعاندة بس فى الإخوان.. وإنت لا عندك صاروخ ولا حتى دبابة.. ولا حتى عندك فلوس تصرف فى كل مكان.. ولا حتى عندك كتيبة قائدها «حازم» بيه.. اللى كتائب المصارعة كلها فى إيديه.. حتى ماعندكش عجل بلاش نقول عجلين.. قدام إدارة القناة نعمل عزومة عليه..
وكمان ماعندكش سكر تفرقه ودقيق.. ولا حتى عندك بلوفر حلو زى «شفيق».. ولا حتى فى الانتخاب تعرف تزور صوت.. ولا حتى تعرف تقول العبرة بالصناديق.. ولا حتى تعرف تنام زى «هشام قنديل».. نهاره نايم عشان بينام كتير بالليل.. والدنيا بايظة ومفيش عسكر ولا ضباط.. وكل يوم فيه مظاهرة يطب فيها قتيل.. يا عم «باسم» خلاص النقد بقى محظور.. وكل واحد هيلبس حدوة أو طرطور.. وكل مصرى هيلبس بردعة ولجام.. حتى «..» هنلبسوه بالدور.