يا ريس مرسى.. على إيه معاك هانرسى.. فاكر وعودك ولا ها تنسى.. يوم ما قلت ميت يوم .. ونهضة معاها هانقوم.. صدقنى أنا مش ها شكى ولا هالوم.. ولا هاسمعك كلام بتسمعه كل يوم.. أنا إنسان حلمت معاك ألمس النجوم.. فاكر يا ريس لما قلعت الجاكيت.. وقلت أنا مش خايف من الرصاص.. وكنت معانا وسط الناس.. ليه حاسس إن رقبتى لسه بتداس.. من شيخ عايز يفرض عليا الوصايا.. ولا أسعار ما بتراعيش ظروف الغلابة.. الفلوس من المرتب بتنقص.. وتروح الفلوس لناس مش محتاجة.. طب ممكن بعد إذنك أقولك حاجة؟.. وتجاوبنى بصراحة.. أنت حاسس بيا ولا الكرسى أخدك لبعيد.. ولا سامعنى وبرأيك عنيد.. أنا مش عايزك تقعد ولا تمشى.. ولا وجودك تحميه حراسة تفتشنى.. ولما أعترض تدشدشنى.. طب فرقت إيه عن اللى فات؟.
لسه ما بيوصلنيش غير الفتات.. وناس تعاملنى باستعباط.. همه يزيدوا غنى وما ليش غير الأزمات!!.. يا ريس الأزمة مش سياسية.. الأزمة أزمة غلابة عليهم الدنيا بتأسى.. حس بيهم كلهم.. عيش فرحتهم وشيل همهم كلهم.. لما يشوفوا إنه للكل خيرك.. هتفضل ف قلوبهم وعمرهم ما هيتمنوا غيرك.. نصيبك إنك جيت ف ظروف ضلمة.. وسط ناس بتحلم بنورك.. أنا نقلت لك كلمتى.. والدور الجاى دورك.