بكى الفنان جمال يوسف، على الهواء، خلال حواره في برنامج «صباح البلد»، المذاع على فضائية صدى البلد، أثناء تحدثه عن إصابته بسرطان البلعوم.
وقال في تفاصيل إصابته: «لقيت أحمد ابني دخل عليا الأوضة وأنا نايم وقولتله مش عاوز أتعالج، قالي أرجوك أنا عاوزك تتعالج وتقوم، أنا حاسس إن ضهري اتكسر من غيرك.. لما ابني قالي الجملة دي أنا إتكسرت وبقيت بقول يارب، ومراتي قامت الصبح على أساس إني مش هروح الإشعاع وقولتلها لا أنا هروح، أنا عاوز أربي ولادي».
وأكمل حديثه باكياً: «الدكتور قالي وقف جلسات الإشعاع رفضت وقولتله إني هكمل، وبالفعل كملت الـ35 جلسة وتعبت، ولساني إتحرق ورقبتي كلها، مكنتش بعرف آكل أو أشرب وقعدت فترة كبيرة معتمد على المحاليل، وقولت هقاوم علشان خاطر ولادي».
وأكمل: «قلت إني هقاوم، والفترة اللي فاتت تعبت جدا بعد العلاج، ومفيش أي تحسن وعدى نحو 3 أسابيع ومش عارف آكل أو أتكلم ولما بتكلم بتهته لدرجة إن مراتي جابتلي جرس بجوار السرير علشان لما أعوز مياه أو أدخل الحمام، لأن كانت عندي قرح فراش تعبتني زيادة وجابتلي يأس زيادة».