رفض مطرب المهرجانات حمو بيكا الغناء على هواء برنامج الإعلامية لميس الحديدي «القاهرة الآن»، المعروض على قناة «الحدث»، معربًا عن أمله في حل مشكلة مطربي المهرجانات مع نقابة الموسيقيين، برئاسة الفنان هاني شاكر.
وقال «بيكا»: «حسن شاكوش موقفش معانا، وقال إنه خد المهرجان في حتة تانية، المهرجان مهرجان، وإحنا مش بنغني على تخت، مش هنضحك على نفسنا»، معتبرًا أن «المهرجان حاجة شعبية، زي الراب الأجنبي، إحنا بنغنيه شعبي ومن واقع الشارع».
أضاف: «عشان منضحكش على بعض، هما (مسؤولو النقابة) عايزين يمحو المهرجانات، بس صعب يقدروا يعملوا ده»، مؤكدًا: «إحنا هنفضل نغني مهرجانات، كفاية إننا بننزل الشارع مش بنعرف نمشي من الناس، الناس بتحبنا».
وعن دخله الشهري من المهرجانات، قال: «المهرجانات لو بتجيب لي في الشهر 20 أو 30 ألف جنيه في الشهر أنا راضي بيهم، اليوتيوب عليه ضريبة»، مضيفًا: «أنا بيدخل لي في الشهر 90 ألف جنيه، واليوتيوب مش بيجيب لي ملايين».
تابع: «إحنا بننزل الشارع مش عشان نجيب ملايين، عشان نشوف الناس اللي بتحبنا، زينا زي أي مطرب. أنا آسف، أي مطرب وأنا صغير كنا بنسمعه، ووالدتي مقالتش إنها عايزة تكلم هاني شاكر، هي قالت إنها مش عارفة هما بيهاجموا ابني ليه».
اختتم قائلًا: «المشكلة بإذن الله هتتحل قريب، أملي كبير إنها تتحل، وأنا دلوقتي في الاستديو بسجل»، رافضًا طلب لميس الحديدي الغناء على هواء البرنامج.