أبوهم مات
وساب ولدين وبنوتة
وست كبيره كانت كل يوم تجمع عيونهم بين 3 كلمات
تعالوا احكيلكوا حدوتة
سنان الديب بتاكل أى حد ضعيف
وضافر قطة الغابة مبيخوفش غير الفار
فاوعوا ف مره حد يقول عليكو صغار
ابوكوا لما كان يفتح بيبان جلابيته ع الدنيا
عيونوا كات تزلزل بوابات الدار
ابوكوا كان جدع وشريف
وكان ميخافش غير من ربنا الجبار
فاوعوا ف مره حد يقول عليكوا صغار
زمان انا كنت اخيط جرح ابوكوا بضحكه فوق الخد وكنت اعمل عيونى كتاب وقهوه ونشره وسيجاره
مكانش معايا يحتاج انه يعرف حد
وكان دايما يدلعنى يا سحاره
يا جامعة عيونى جواكى انا فداكى
يا اطيب حب جوايا يا صاحبة ضحكتى الاولى
ابوكوا كان بيتعامل معايا بطيبة ورجوله
وكان بيحبكوا جدا
وحاسس انه مش هيكمل المشوار
فاوعوا ف مرة حد يقول عليكوا صغار
ابوكوا كان مكبركو
وسايب سمعته مسند يقويكو
ابوكو كان بيحميكوا بحب الناس لحد ما مات
ودلوقتى انا معاكو بلم عيونكو يا حبايبى ب 3 كلمات
لحد الليل ما يبقى يفوت
ويمكن لما يجى الصبح
ينادى عليا ابوكو واموت
وتبقوا لوحدكوا لكن هتبقوا كبار
.