«ازرع ورد» (شعر)

ما فيهاش أزمة..

إنك تعلن ع الملأ الميّت

إنّك جاى للعالم تزرع ورد

...... وتغطّى البرد بروحك

...... وتفرّق ع المحتاج للضيّ شموع

...... وإنك هتحاول تمسح أى دموع هتشوفها

................. إلا دموع الفرحة

........ هاتقيد جمرتها بكلّ ما فيك

...... وإن حد فردلك إيد بالشرّ..

............. هتمدّ إيديك بالحب...

........ جايز تطفى النار الوالعة ف قلب الغير

..... اعلن ع الملأ الميّت إنك طير

....... أو سجادة ف جامع

......... أو كَنبة ف دير

واكتب ع الأرض بقلم البوص

....... أنا واحد عايز يبدر خير

........... مستنى التوت يطرح عصافير

والريح يبدر آخر عناقيد الشمس

...........ف آخر ركن

.......... ف آخر أوضة بتنشع ملح من الجدران

لو كل طيور الله بردانه أعمل دفيان

واضحك لو حزنك ميت فدّان ف وشوش الخلق

الحلق المليان شعر ونور وغنا وتفاريح

أطيب بكتير...

م الحلق المليان عتمة وخوف وقلق وصديد

العيد بيعدى ما بيهدّيش

......... غير للمستنى يشوف العيد

ونجوم السما ما بتتفسّرش لواحد جواه ناس عميان

لكن تتفسّر للإنسان

الفرد الموهوب للمجموع

اللى يحس بوجع الموجوع

وبيهرى حشاه الجوع

........ إذا مر عليه فى الشارع حدّ جعان

ما فيهاش أزمه

إنك تتحدّى الشىء المحشور جوّه الشريان التاجى

وتجرى لحد ما تاخد كل شوارع شرايين الناس المسدودة ف حضنك

وتطبطب ع المساكين من غير ما يحسّوا

وتبوس راس كل العواجيز اللى اتحدوا ظروف القهر

...... وعاشوا بأرواح أطفال وقلوب حملان

الدنيا ماهيّاش مَنّ

الدنيا دى فنّ لكل العايز يتحوّل

من كائن شبحى

لكائن فنّان

اكتب على إيدك بالقلم الكوبيا نويت

واتخلّص من كل الزناطيط المرسومة على جبينك

....................... وكأنك بلياتشو ف سيرك

أينعم العالم لسه الضلمة محاوطاه من كل مكان

بس أنت كمان جواك إنسان

يقدر يزرع ورد

..... ويفرّق ع المحتاج للضى شموع

.....................

شعر سعيد حاتة