دافعت الممثلة آيتن عامر عن ظهورها الأخير في برنامج «معكم» مع الإعلامية منى الشاذلي للحديث عن نظامها الغذائي الذي تتبعه لإنقاص وزنها بعد وضع مولودها الأخير.
وقالت عبر حسابها الشخصي على «فيس بوك»، مساء الأربعاء: «أيوة في مشاكل أهم وأعمق من المشكلة بتاعتي اللي تناولتها النهاردة الإعلامية منى الشاذلي، لكن خلينا نشوفها بشكل تاني، ليه منقولش إن تجربتي دى ممكن تبقى حافز لناس كتير نفسها تخس وظروفها المعنوية أو المادية مش مساعداها، خصوصًا إن الدكتور وافق ينزل الأنظمة الغذائية كاملة دون أي مقابل».
وأضافت: «ليه منقولش إن دي تجربة فعلية تخلي الناس اللي بيتضحك عليها باسم عمليات التكميم وتحويل المسار وبيبقى عندهم استعداد يبيعوا دهبهم ويعملوا جمعيات عشان يعملوا العملية مع إنه من الممكن منضرش صحتنا ونخش غرف عمليات ونعمل دايت وتخس ومنتكلفش كل الفلوس دي».
واختتمت: «ليه الحلقة دي متكونش بتهون على كل واحدة لسه مخلفة ووزنها زايد وعندها اكتئاب وبتوريها إنها مش لوحدها اللى بيحصلها كدة وإنى كممثلة لا أتميز عنها بشئ سوى الإرادة وأشجعها تبدأ معايا، بلاش هجوم بلا داعي، أنا مش هقدر أحل مشاكل الكون ولا مشكلة الغلاء، لكن ممكن أكون مصدر إلهام لبنات كتير وأساعدهم على الوصول لحلم صغير لأن هو ده اللي هقدر عليه».