فى حتتنا التاريخ بلسان ولحم ودم
ورغم أنه كبر سنه بشيل الهم
بيحكى ع اللى فات حكايات
ودايماً باللى جاى مهتم
فى حتتنا التاريخ بيقول ومايهموش
فى حتتا التاريخ صادق ومش مغشوش
وتلقاه ع الوشوش منقوش وع الجدران
فى حتتنا التاريخ إنسان
مابعشى ذمته بفلوس
ولا لأحمس ولا لهيكسوس
فى حتتنا التاريخ عادل
لا عنده خيار ولا فقوس
فى حتتنا التاريخ محبوس بقاله سنين
وفاكر أبسط التفاصيل
لأعظم ناس وللمساكين
تاريخ أعجز من العواجيز
وم الأوجاع بيتألم
ويتعكز على العكاكيز
وبالعافية بيتكلم
وبيبروز لنا البراويز
عشان نفهم ونتعلم
بأن إللى يعيش فى القلب مايموتشي
ويفضل حلمنا المكبوت
وإن إللى يفوت م العمر مايفوتشي
لأنه باللى جاى مربوط
وإننا حتى لما نموت
هتفضل عايشه قصتنا
عشان العمر مابيوقفشى عند الموت
فى حتتنا
شعر/ أسامة عبدالصبور