كان فيه بنوتة صغنطوطة وسكرة.. كانت زعلانة من ناس بتحبهم زعل كبير أوى.. والبنوتة دى كان ربنا مديها هدية صغيرة عشان يشوف هى بتحبه قد إيه وهتقبل هداياه حتى لو كانت الهدية دى شوية تعب صغيرين.. وفى الأول قررت إنها ماتسمعش الكلام وماتاخدش العلاج بتاعها اللى هيساعدها فى إنها تبقى قوية لحد ما تكبر وتحقق كل أحلامها.. يمكن كانت مش بترضى تاخد العلاج علشان زعلانة.. أو يمكن تكون ماكانتش بتحب العلاج.. لكن عمو بتاع الحواديت اللى بيحب كل الأطفال وبيخاف عليهم عرف وقرر يبعتلها جواب.. وكتبلها فى الجواب اتفاق يمكن تحبه وتوافق عليه.. حبيبتى الجميلة السكرة.. أنا اسمى كالا وبحب كل الأطفال الصغيرين.. وعندى بنوتة صغيورة جدا وبحبها ونفسى لما تكبر تبقى جميلة زيك.. ولإنى بحب الحواديت اللى كلها أبطال والناس بيحبوها.. فهنعمل مع بعض اتفاق..
أول حاجة لازم نتفق عليها هى إننا نساعد بعض أنا وانتى نحقق أحلام جميلة بنحبها.. بس شرط تحقيق الأحلام هو إننا لو حد فينا عنده هدية من ربنا عبارة عن شوية تعب يبقى لازم ياخد العلاج علشان يبقى قوى.. وساعتها نقدر نحقق أحلامنا الكبيرة والصغيرة.. وتانى حاجة فى الاتفاق إننا نسمع كلام الأكبر مننا لإنهم بيحبونا وعاوزين يخلونا مبسوطين.. وتالت حاجة إنك تبقى البطلة بتاعة الحواديت بتاعتى.. ونروح أنا وانتى نعمل كل المغامرات اللى البطلات بيعملوها.. وكل مغامرة نعملها نكتبها ونحكيها لكل الأطفال الصغيرين علشان يفرحوا.. وبكده انتى ممكن تبقى فرحانة ومبسوطة بالمغامرات اللى هنعملها.. وأنا هبقى فرحان ومبسوط إنى أخيرا لقيت بطلة جميلة وزى السكرة.. وبعد كده عمو بتاع الحواديت شكرها وقالها إنه مستنى ردها عليه لو عجبها الاتفاق.. ونشر الجواب فى أكبر جرنال ومعاه قلوب كتير وكلام كله حب.. وهو دلوقت منتظر ردها علشان تحدد المعاد اللى تحبه علشان يتقابلوا ويتفسحوا ويعملوا كل المغامرات اللى تليق ببطلة صغنطوطة وجميلة وسكرة.. يا ترى لما يتقابلوا هيحكولنا مغامرة عن إيه؟