كان فيه بنوتة جميلة وأمورة اسمها نعناعة.. كل الناس كانوا بيحبوها وبيحبوا يسمعوها وهى بتغنى للعصافير وهى بتضحك.. ده حتى العصافير الجميلة كانت بتيجى تغنى وتزقزق على الشباك بتاعها من كتر حبها فيها.. وفى يوم من الأيام وقبل ما ييجى معاد الرحلة اللى باباها ومامتها بيعملوها ليها فى الصيف علشان يشوفوا البحر ونعناعة تفرح وتغنى للبحر وتفرح كل الناس.. قبل الرحلة بكام يوم نعناعة حطت إيدها على بطنها وقعدت تعيط كتير بالدموع وهى بتقول لبابا وماما أنا بطنى بتوجعنى.. ماما اتصلت بالدكتور وراحت هى وبابا علشان يكشفوا على نعناعة الجميلة.. كل الناس زعلوا علشان نعناعة الجميلة إللى كانت دايماً فرحانة وبتغنى وبتجيب أحلى الدرجات.. كل أصحابها راحوا يزوروها وهمّ زعلانين علشان أول مرة يشوفوها مريضة ومش بتضحك وتغنى.. ونعناعة كل ما حد يزورها تحكيله الدكتور قالها إيه.. أصل أول ما راحت للدكتور راح سأل نعناعة وقالها: يا نعناعة يا حبيبتى هو إنتى كلتى حاجة من الشارع مش نضيفة؟ قالتله وهى بتعيط وبتتألم: لأ يا عمو.. دا أنا ما باكلش غير فى البيت ولازم ماما وبابا يكونوا عارفين أنا باكل إيه.. قعد الدكتور يسألها كتير ويفهم منها هى عملت إيه علشان بطنها الرقيقة الصغيرة توجعها.. وبعد أسئلة كتيرة عرف إنها ساعات بتنسى تغسل إيديها قبل الأكل وبعد الأكل.. وفضلت نعناعة نايمة فى السرير وهى بتاخد العلاج وحزينة على الرحلة إللى ممكن تتلغى..
وبعد ما كانت بتحكى لأصحابها اللى بيزوروها، كانت بتقعد تحذرهم من الأكل من غير غسيل الإيدين.. وبعد ما خفت كتبت لوحات كتير صغيرة وعلقتها فى الأوضة بتاعتها.. كل اللوحات كان مكتوب فيها إن لازم نغسل إيدينا قبل الأكل وبعد الأكل.. ولازم نغسل إيدينا بعد ما نمسك فلوس أو أى حاجة ناس كتير بتمسكها.. وكتبت إن الميكروبات كائنات صغيرة ممكن تتنقل بسهولة وتدخل جسمنا وتوجعلنا بطننا لو ما غسلناش إيدينا باستمرار..
نعناعة وكل أصحابها وصاحباتها الأطفال بقوا ياخدوا بالهم باستمرار من نضافة إيديهم.. والحمد لله نعناعة الجميلة رجعت تغنى ووجع البطن راح ورجعت تلعب وتضحك.
محمد عبدالفتاح حماد