واجه سيد عبدالحفيظ مدير الكرة في النادي الأهلي، عصام عبدالفتاح، رئيس لجنة الحكام باتحاد الكرة، حول الأخطاء التحكيمية ففي مباراة الأهلي وفريق طلائع الجيش.
قال سيد عبدالحفيظ مدير الكرة في النادي الأهلي، في مداخلة هاتفية لبرنامج «العاشرة مساء» على قناة «دريم»: «في البداية لازم نوضح إحنا من أكتر الناس اللي بتساعد ومش بنهدد ولا بنرهب الحكام، ولا بنضخم الحدث بس فيه فرق إننا نننتقد خطأ أو اتنين أو ثلاثة متكررة، وأنا بتكلم عن 90 دقيقة لو تم تحليلها هنلاقي أخطاء كتير جدا وأنا شغلتي إني أقيم».
وأضاف: «هل مباراة بحجم الأهلى وطلائع الجيش تقاس مش بنفس قوة إنبي وسموحة، ومشكلتي مش مع الكابتن حمدي».
وتابع: «تغلط مفيش مشكلة لكن أنا بتكلم على القدرة والكفاءة في 90 دقيقة بشكل عام».
من جانبه، علق عصام عبدالفتاح، رئيس لجنة الحكام باتحاد الكرة، إن «الأخطاء واردة في كل الدنيا، ونحن نعد جيلا جديدا من الحكام، والحقيقة أحزنني التقليل من قيمة الحكم وإحنا لعبنا 8 مباريات والتقييم كان ممتاز، وشيء طبيعي في كل العالم، وإحنا عايزين نغير الوعي والأندية الكبيرة مش النادي الأهلى بس تحديدا بتدخل التحكيم في أشياء مالهمش فيها».
وأوضح: «أن البعض صرح في الإعلام أن الحكم تم إيقافه وهذا كلام عار من الصحة وعمرنا ما بنعلن عن إيقاف الحكم، وحتى لو فيه شيء من هذا القبيل لا نعلنه، واللي مش عاجبه الحكام المصريين يجيب أجاب، ولن يكون التحكيم ضعيف بعد اليوم، ولن نقبل أحد يهيينا ونقف على مسافة متساوية من الجميع».
وتابع: «زي ما أنا مش بتدخل في انت بتلعب مين ومش بتلعب مين محدش يتدخل في اختيار الحكم الفلاني أو غيره لأي مباراة».
من جانبه، رد «عبدالحفيظ»، قائلا: «التوجيه ده ميتقالش ليا أنا تحديدا ولا للنادي الأهلي لأن محدش من عندنا رفع سماعة وكلمهم».
ورد «عبدالفتاح» عليه قائلا: «احنا بنحترم النادي الأهلي لكن لا نقبل الإهانة والكابتن سيد اتكلم على الحكم بشكل مهين وقال قدراته ضعيفة واحنا عندنا تسجيلات وهنقدمها، والنادي الأهلي محترم».
واستدرك «عبدالحفيظ» قائلا: «كابتن عصام مصصم يدخلنا في حتة معينة ويدخل الجهاز الفني وإدارة النادي الأهلي في حتة معينة، وكل اللي اتكلمنا عليه أداء الكابتن أحمد حمدي وأنا ما أهنتوش، وإحنا مش الناس اللي بتهين حكم ولا بتتدخل في التحكيم، وإنت شايف إنها ضربة جزاء واحدة، والعالم كله شايفهم 4، وفيه حكام وإداريين اتشتموا قبل كدة وإنتوا ما عملتوش حاجة».