هاجم مرتضى منصور، رئيس نادي الزمالك، الأرجنتيني هيكتور كوبر، المدير الفني للمنتخب الأول، وذلك بسبب اختياراته للاعبين المنضمين لمعسكر الفراعنة استعدادًا للقاء تونس، في تصفيات أمم أفريقيا 2019، فضلًا عن الإعلان التليفزيوني لإحدى شركات الاتصالات، والذي ظهر فيه مع معاونه محمود فايز.
وقال مرتضى منصور: «واضح وهو بيختار كان عنده المغص بتاع مطعم سيدنا الحسين. عيب انت راجل مش صغير. انت مدير فني لمنتخب مصر».
وأضاف: «لما تختار 10 من الأهلي و5 من الزمالك، أنا ممكن أقولك مش هايروحوا المنتخب. الشركة اللي بترعى الأهلي عملتلك الإعلان، علشان كده أخدت 10 من الأهلي، وبقولك لا إحنا صاحيين أوي».
وتابع: «انت المفروض علشان التسمم اللي جالك ترجع بلدك. انت بتسيء لسمعة مصر وأكل مصر، انت أسوأ دعاية لبلدنا، في سيدنا الحسين أنضف مطاعم. هو ده ياهاني أبوريدة اللي انت جايبه بدل ما تعمل دعاية محترمة لبلدك».
واختتم: «ربنا يوفق مصر في ماتش تونس، وتكون مباراة تليق ببلدين بينهم علاقات قوية من زمان».