أمانة يا دكتورة غادة والى.. أمانة نظرة بقى لحالى.. حضرتك وزيرتنا والمسؤولة عن معاشاتنا وصاحبة مقام عالى.. أنا اللى ضاع شبابى هدر، وأكيد عندك خبر م اللى جرالى.. مالى ضاع ف البورصة بفضيحة وجرسة وراحت على فرصة تحسين أحوالى.. والمعاش خلاص ما بقاش يكفينى عيش حاف أنا وعيالى.. والصحة اعتلت، والجنيه قيمته قلت، والدوا تمنه غالى.. مش عارف أتعالج، وغيرى بيتعالج ف الخارج من ثروتى ومالى.. وأنا من حقى أعيش بدون تهميش، وعشمان ف نظرة بقى لحالى.. يا رئيس مجلس الوزرا أمانة توصى علينا الدكتورة غادة والى.. يمكن تحن وقلبها يرق وترأف بحالى.. دا العمر ضاع ف خدمة بلدى، والستر هو راس مالى.. وكل منايا تمنحنا علاوة اجتماعية أنا وأصحاب المعاشات أمثالى.. يمكن تعدل الحال المايل، ويرتاح بالى.. دا أنا ليل ونهار مشغول البال، وغادة بتقول وأنا مالى!!..أنا مش مسؤولة عن ضياع مالكم ف عهد الوزير الهارب بطرس غالى.. وأنا مش عارف أروح لمين، وأقول يا مين يرأف بحالى.. يا رئيس مجلس الوزرا، العين مجافيها النوم، وما ينام الليل إلا أبوقلب خالى..!!
فؤاد عبدالرازق - مدير عام سابق- الإسكندرية
