جدد الفنان أحمد عز تأكيده على رفض نسب «توأم زينة» له، قائلا: «كلامي مش هيتغير من هنا لحد ما أموت، وأهم حاجة صورتي عند ربنا ولو هبطل تمثيل وأفتح كشك سجاير، وللمرة المليون دول مش ولادي».
أخبار متعلقة
وقال «عز» في مُداخلة هاتفية مع محمد حسن، مقدم برنامج «نص الليل» على قناة «CORRECT»، اليوم الأحد، إنه يفضل اللون الأبيض في حياته سواء الملابس أو داخل المنزل، وكذلك لون السيارة التي يمتلكها.
وأضاف «عز» ردًا على ما وصفه بـ«الشائعات» حول مسيرته وأعماله الفنية: «في الأول والآخر البني آدم مهما حاول يلف ويدور ربنا عارف كل واحد عامل إزاي، ربنا بيكرمني عشان تعاملي مع الناس، أتمنى أبقى من الناس دي اللي من جواها أبيض».
وعن استخدامه «حقن البوتكس»، قال: «أنا معرفش الرغي ده منين، واتعودت على كده، مفيش أدوار سينمائية تحتاج بوتكس، الناس بتحاول ترغي حواليا، دي سُنة الحياة، الناس عايزة تنشر الشائعات، وأنا مش مهتم وأهم حاجة صورتي عند ربنا».
وعن خلافه مع زينة، قال «عز»: «كلامي مش هيتغير من هنا لحد ما أموت، ومعنديش قلق من القضية دي»، وأضاف ساخرًا: «أنا متأكد يعني»، وتابع: «ربنا عالم بالحقيقة، صورتي عند ربنا أهم من صورتي عند الناس، حتى لو هبطل تمثيل وهفتح كشك سجاير، أنا مش بهزر في الحاجات زي دي، الموضوع منتهي».
وواصل تعليقه على «خلافه مع زينة بشأن قضية نسب أولاده»، قائلًا: «حتى لو حاولتي تعملي إيه تكتبي أو تغلطي أو تأجري ناس تكتب، فربنا اللي مقدره هو اللي هيحصل، واللي عارفني عن قرب متأكدين إني معملش كده، وعارفين أنا مين ومتربي إزاي، ولكن سُنة الحياة كل ما يبقى فيه نجاح لازم يبقى فيه هجوم».
وأكد أنه «يرفض الخوض في أعراض من تحدثوا عنه بسوء»، مضيفًا: «للمرة المليون مش ولادي، مش ههزر مع ربنا مهما حصل، لو هفتح كشك سجاير ومش هتكلم في أعراض عشان عيب رجولتي تمنعني أتكلم في حاجة زي دي».
