كل العيد ما يطل عليا فرح الدنيا ما كانش يسعنى.. آخد لبسى فى حضنى وانام، وادخل حلم ما شىء يفجعنى.. سايق قطر العمر بلهفة، أب ساندنى ومدلعنى.. بدل الجزمة يجيب اتنين.. ومن اللبس يجيب طقمين.. «نفسى» أقولها.. طلبى مجاب بعد الكلمة بدقيقتين.. كأنى فركت فى يوم مصباح طل أبويا منه فزعنى.. قال شبيك وقال لبيك بكل الود حضنى سمعنى.. كلمة موت ف قاموسى لا تعنى.. فجأة الموت فى زمانى اتجسم لمر الدنيا ف لحظة وباعنى.. فجأة مشيت وسمعت صويت مش هتبوسنى وتودعنى؟.. والمصباح بيطفى النور، وافرك وافرك مين يسمعنى.. أهل الخير سامعين أنَّاتى؟.. طب شايفين دنيتى وحياتى؟.. أنا من ليلى عُنْت بخاف.. عايز حضن يضم آهاتى.. عايز عدل مع الإنصاف.. عايز قلب كمان يِشْبِعنى.. عايز أرجع تانى أحس إن الكون ويايا ما باعنى!.
أخبار متعلقة
سامح لطف الله
