نشرت الصفحة الرسمية لإذاعة «نجوم إف.إم»، عبر «فيس بوك»، رسالة جديدة من الفنانة شيرين عبدالوهاب تتحدث فيها عن اعتزالها الفن.
أخبار متعلقة
وقالت «شيرين» في الرسالة: «أحيانا بنتعرض لضغوط أكبر من طاقتنا، الفترة اللي فاتت كانت صعبة عليا جداً لظروف شخصية وضغط شغل لفترة طويلة وهجوم إعلامي غير مبرر واحساسي بانشغالي في العمل وتأثيره على بناتي وأسرتي، عارفة إن الخبر كان صادم للكاره والمحب ليا بس أنا كنت حاسة انه الابتعاد هو الحل في اللحظة دي، لحظة حسيت فيها بتعب حد من عيلتي، وحسيت إن الدنيا مش مستاهلة وإن كل لحظة بعيدة عن اللي بحبهم هي لحظة ضايعة من عمري».
وأضافت: «أسفة على القلق اللي سببتهولكم، بس صدقوني، مشاعركم هي اللي خلتني أراجع نفسي وحبكم هو إللي حسسني إن صوتي مش ملكي وإن الفن ملوش علاقة بضغوطات عليا، أما عن رجوعي، فأنا بارتب بس بعض الحاجات وبعمل ترتيبات، أحب أشكر كل من ساعدني إني أتخطى محنتي من جمهوري وفنانين وإعلام مصري وعربي نزيه لا يفبرك ولا يشمت ولا يشخصن الأمور أو يستنتج سيناريوهات».
وتابعت: «هابعد لفترة إجازه مع عيلتي وبعدها إن شاء لله أعود تاني للعمل، مرة أخرى، شكرا لمن ساندني، وسامحت من ضايقني».
