يا رئيس مجلس الوزراء ياغالى.. نظرة بقى لحالى.. سيادتك رئيس حكومتنا ونوارة بلدنا وصاحب مقام عالى.. أنا اللى ضاع شبابى هدر، وأكيد عندك خبر م اللى جرالى.. مالى ضاع ف البورصة بفضيحة وجرسة للوزير الهارب بطرس غالى.. والمعاش فنيتو خلاص ما بقاش يكفينى عيش حاف أنا وعيالى.. بعد الصحة ما اعتلت والفلوس قلت وتمن الدوا غالى.. والتأمين الصحى أصبح خاوى لا فيه دوا ولا حتى مداوى.. ومش عارف أتعالج وناس بتتعالج ف الخارج من ثروتى ومالى.. وإن قلت البغل ف الإبريق المسؤول يقول وأنا مالى.. طب أروح لمين وأقول يا مين ينصفنى ويرأف بحالى.. إنت رئيس حكومتنا وأمل المظلومين ف بلدنا أصحاب المعاشات أمثالى.. وأنا من حقى أعيش بدون تهميش وهى دى كل آمالى.. أمانة عليك أمانة حلفتك بالأمانة تنظر بقى لحالى.. وتوصى وزير ماليتنا يمكن يعطف وقلبة يرق ويرأف بحالى.. دا العمر ضاع يا ولدى ف خدمة بلدى، والستر هو راس مالى.. والمعاش شوية فكة وكم مليم، والأسعار فوق ف العلالى.. نار يا حبيبى نار، ودليلى احتار، ومبقتش عارف يمينى من شمالى.. وغيرى عايش متهنى، ومعاشى ما يكفيه فول سودانى ولب تسالى.. وعينى مجافيها النوم، ما يشوف النوم إلا أبوقلب خالى!!.
أخبار متعلقة
فؤاد عبدالرازق- مدير عام سابق- إسكندرية
