قال أحمد حسام ميدو، المدير الفني للإسماعيلي، إنه من الطبيعي عندما تدلي برأيك في أي موضوع أن يتجادل الجميع على ما قلته، «خاصة إذا كنت مثلي تقول رأيك بصراحة ولا تخاف من أحد»، وذلك تعليقًا على الهجوم الذي تعرض له عقب تصريحاته بشأن محمد صلاح، المحترف في صفوف روما، وأن الأخير لاعب مميز لكنه لا يملك «الكاريزما».
أخبار متعلقة
وأضاف «ميدو» عبر حسابه بموقع «تويتر»: «فيه الجبان اللي هيستنى يشوف الموجة رايحة فين وهيركبها من غير حتى ما يحاول يفهم انت قولت إيه، وفيه المنفسن اللي فاكر كل الناس منفسنة زيه وما عرفش يعني إيه إنك تقول رأيك بصراحة بدون أي حسابات، وفيه العبيط اللي مشتاق لكلمة في الإعلام، وفيه اللي يحاول يفهم انت قولت إيه ويقيم الموضوع وما يديلوش أكبر من حجمه».
وواصل: «يعني إيه واحد عنده كاريزما؟؟ يعني واحد شغال في مجال ويخلي الناس اللي مش مهتمة بالمجال ده تهتم بيه وبأخباره الشخصية».
وأوضح: «يعني ممكن لاعب كويس يقدر يخلي حتى الناس اللي مالهاش في الكورة حريصة على متابعة أخباره زي بيكهام مثلًا، وفيه لاعب جامد جدًا بس ماعندوش الكاريزما اللي تخلي ناس مالهاش في الكورة عايزة تتابع أخباره زي ريفالدو مثلا».
واختتم: «ساعات بتحاول تقول رأي وتلاقي كل واحد ياخده في الاتجاه اللي هو عايزه.. لكن بالنسبة لك هيفضل رأيك هو وجهة نظرك الخالصة اللي قولتها وخلاص، وعموما قمة النجاح انك تقول كلمة وتخلي الناس كلها تختلف عليها وهو ده الهدف من الظهور الإعلامي».
