عبر تامر حسني لجمهوره عن قيمة العمل والسعي وراء الأحلام لتحقيقها مهما كانت العقبات من خلال رسالة وجهها لجمهوره عبر صفحته الشخصية على «فيس بوك» قال فيها: «أولاً ربنا يحقق لكم كل احلامكم ويفرح قلوبكم ويشفي كل مرضانا وينصر شعوبنا العربية».
أخبار متعلقة
وأضاف: «ثانياً انا فرحان جدا ان الموضوع اخد شكل ايجابي من ناحيتكم وكل واحد قال اللي في قلبه بجد وشوفوا يا جماعه انا حبيت اتكلم وادخل جواكوا لأسباب كتيره أولها أني بحبكوا والأهم إن انا نفسي تنجحوا وتحققوا احلامكم وعارف تماماً ان الفتره دي صعبه في حياتنا كلنا والجيل ده فعلاً عاش فتره صعبه من التخبط وفجأه شاف حاجات كان لا يمكن يتخيلها».
وتابع: «أنا قرأت كل كلامكوا وفرحت اوي ان كلكوا عندكوا احلام لان مهم جداً انكوا تحلموا مهما كانت الظروف صعبه لازم تحلموا واوعوا تتخيلوا ان الأحلام مش بتتحقق انا قدامكوا اهو بدأت من تحت الصفر في ظروف ماديه منعدمه وفي انفصال اسري وتعبت وسهرت واتجرحت وياما ناس اتريقت على طموحي واحلامي وقالولي يا بني انت مجنون ورغم ان ما كانش معايا فلوس خالص ولا عربيه ولا حتى عجله بس كان معايا اسلحه رهيبه اقوي من أي شيء».
واستكمل: «إيماني بأن لكل مجتهد نصيب ٢- الأمل ٣-الصبر ٤-العند، ٥- الإجتهاد وحاجه مهمه اوي ٦-معرفة قيمة الوقت وانت وشطارتك هتستثمره في أيه لازم كل واحد فينا يخطط لمستقبله من اللحظه دي ويقسم بالله انه من اللحظه دي هياخد اول قرار لتغير مسار حياته للأفضل مثلا يمتنع عن صفه أو عاده سيئه فيه ويبدأ صفحه جديده مع نفسه يدور على شغل بسيط لحد مايلاقي حلمه الأكبر مش عيب انك تبدا من تحت الصفر العيب انك تقف تتفرج ذاكر انجح رتب مراحل حياتك واكتبها بجد قول انا لازم انجح في دراستي وبعدها لازم اشتغل وانجح في شغلي لازم اكون شخص مشرف لأهلي ولبلدي لازم اعوض تعب اهلي لازم اكون شخص ايجابي مركز في أحلامه مش في الناس».
واختتم: «قول لازم اوصل للي بحبها ولازم تكون فخوره بيا ماتركزش مع أي شخص يحاول يهدك ابعد عن أي صديق يشدك للخلف واوعى تقول ظروفي عشان في ناس ظروفها اصعب وصممت تنجح وتوصل ونجحت فعلاً ووصلت لأكبر المراكز يلا كلنا من دلوقتي كل واحد فينا ياخد قرار ينفعه ولو عايز تفيد بلدك ابدأ بنفسك».
