إمتى تتغير فكرتكم عن اللى بينظف شوارعكم.. وتتوب لسانتكم عن قولة يا زبال؟ فى إيدى ماسك مقشتى.. بشتغل بكل همتى.. بعرقى باكل لقمتى.. وراضى ع كل حال.. ترموا أنتم زبالتكم.. وأنا أنضف سكتكم.. وجزائى يكون إهانتكم.. من الكبار والعيال.. يا ناس كفاية حرام.. مستخسرين فىّ ليه الاحترام..ومدوقنى مر الكلام.. ومشيلنى هموم تقل جبال.. مهنتى مش شايفها إهانة.. بشتغلها بإخلاص وأمانة..
أخبار متعلقة
بدل ما أستنى إعانة.. ولا أتسول منكم المال.. عايش راضى بالحالة.. مش مستعيب لم الزبالة..أحسن ما أبقى ع بلدى عالة.. والاسم محسوب ع الرجال..الشغل عمره ما كان عيب.. طول ما فى رضا علام الغيب.. وكفاية إن اللى بيدخل الجيب.. قرش جايلى من الحلال!.
مصطفى سيد عبدالسلام– الدلاتون – المنوفية
