دافع الشاعر والكاتب الغنائي، أمير طعيمة، عن لاعب نادي الأهلي السابق، محمد محمد أبو تريكة، بسبب ما تعرض له من التحفظ على أمواله ومن ضمنها التحفظ على شركة «أصحاب تورز» التابعة له، لاستخدامها كواجهة لنشاطات «إخوانية»، بحسب ما قال الإعلامي خيري رمضان في برنامجه «ممكن» على قناة «سي بي سي»، مساء الخميس.
أخبار متعلقة
وكتب طعيمة عبر حسابه الشخصي على «تويتر»، الجمعة، «الخبر ده لو صحيح يبقي عليه العوض ومنه العوض، أبو تريكة قدم للبلد دي كتير ورمز من رموز مصر عبر تاريخها الحديث وكان سفيرا للبلد دي في كل المحافل الدولية وبنفتخر بيه وهنفضل نفتخر بيه رغم أنف المشككين، وإذا كان كل رموز النظام السابق اللي عاثوا في البلاد فسادا وحققوا ثرواتهم من دم الناس بيستمتعوا بفلوسهم وهنتحفظ علي أموال رمز مصري مخلص تبقي كارثة».
وأضاف «وهرجع أقول تاني أبو تريكة لا مسك مولوتوف ولا لجأ لعنف ولا حرض عليه، وإذا كان بالفعل عنده شركات ففلوسه دي حلاله من تعبه ومجهوده وموهبته اللي ربنا أنعم عليه بيها وأسعد كل مصري بغض النظر عن انتمائه بيها لسنين وسنين، ومجرد أنه في وقت من الأوقات كان شايف أن مرسي رئيسه وانتخبه ودعمه في وقت ملايين انتخبوا فيه مرسي ومنهم رموز ليبرالية ده مش معناه انه إرهابي».
وتابع: «دوروا علي المليارات الحرام اللي اتهربت واللي لسه موجودة جوة البلد بدل ما تتشطروا علي أبو تريكة، أو قدمولنا جريمة واحدة قام بيها أو حرض عليها وهنبقي أول ناس نطالب بالتحفظ علي أمواله ومحاسبته، إتركوا لنا شيئا من الأمل وأقيموا العدل على الجميع قبل ما تيجي مصيبة وتاخدنا كلنا بجميع طوائفنا وانتمائتنا # كوميديا_سوداء».
