انتقد الإعلامي خيري رمضان اهتمام مسؤولي محافظة الغربية ووسائل الإعلام بحفل الراقصة صافيناز، الذي أثيرت حوله العديد من الأخبار حول إقامته أو إلغاءه.
أخبار متعلقة
وقال «رمضان»، في برنامجه «ممكن» على قناة CBC، مساء الخميس: «هو مين النجم في مصر اللي احنا يجب أن نحتفي بيه، واحنا بنتكلم مع كل الضيوف في كل الأوقات بنتكلم عن غياب القيمة، غياب الرمز، وبقينا احنا في ارتباك هو مين اللي احنا بنحتفي بيه، مين اللي يجب احنا نقدمه ونهتم بيه، احنا كإعلام هل يا ترى بنسلط الضوء على النماذج الحقيقية اللي تستحق التركيز، ولا احنا مع الرايجة؟ والرايجة يعني النجم اليومين دول».
وأضاف: «فاكر لما العالمي الدكتور عصام حجي، الذي يعمل في ناسا، اللي اتصدم إن المصريين مشغولين بالعنتيل في شهر نوفمبر اللي فات، في حين إن كان في 5 من علماء مصر في ناسا بيطلقوا سفينة فضاء وبيقوموا بمهمة علمية عظيمة جدًا، ساعتها احنا شدينا ودنا، وقلنا فعلًا معاه حق».
واستطرد: «احنا طول الوقت دايرين حولين الشهب اللي بتروح منورة كدة عاملة هيصة، يطلع عنتيل يطلع صافينار».
وتابع: «تخيلوا إن صافينار رقاصة على فكرة معندهاش أي إماكنيات تانية غير إنها ست حلوة بتقلع وبترقص، بتهز، عندها حاجات بتتهز، ده كل اللي عند صافينار، والبنات الحلوة كتير، بس لقينا صافينار بنت حلوة بتقلع وبتتهز، حديث، خناقة مع متعهدها مش عارفين متهربة اتجوزت، بقت موضوع».
واختتم: «في الوقت اللي بنتكلم فيه هذه الأيام عن صافينار، وتعلن مديرية أمن الغربية أنها غير قادرة على تنظيم حفل صافينار، بيؤكد محافظ الغربية إنه يستطيع تنظيم الحفل بجدارة، احنا إمكانيتنا جامدة جدًا لا صافينار ولا غيرها يهزنا، هي بتهز المسرح بس احنا مبنتهزش، مصر آمنة، مصر قوية مستقرة، حتى ينشغل محافظ بأمر صافينار ويعطي تصريحات وتهتم وسائل الإعلام، محافظ أو مدير أمن، مش هتفرق كتير، هتفرق إن المسؤولين بيأكدوا أنك قادر على تنظيم حفل أو عدم تنظيمه من رقاصة».
