من الناس اللى تحت للناس اللى فوق.. امتى الكل يفوق.. لأ ومليون لأ.. وليه الآه ليكم آه، والآه لينا لأ.. وحياتكم بالقلم والمسطرة متخططة ومتظبطة ومرسومة، وحياتنا شخابيط لخابيط بنستفها قص ولزق.. والدنيا ماشية معاكم بيسر وسهولة، ودنيتنا ماشية عافية وزق.. وأنتم ليكم كل حاجة.. وإحنا مالناش صفة ولا حق.. هى مصر بلدكم ورثتوها عن أجدادكم، وحاجة خلت العقل منكم طق.. كلامنا خيال فى خيال وهم وجنون، وليه كلمة الحق تقف لكم فى الزور والحلق.. الخوف فى قلوبنا ساكن.. وتاهت بينا الأماكن.. واللون الأبيض بعد ما كان أبيض بقى اسود وداكن.. دا أنا المصرى اللى مات حلمه..اللى اندفن معاه أمله.. اللى عمره قصر أوطال، كان حبل بيه اتشنق.. مشتونا وراكم مشينا.. سلمناكم رقبتنا بإيدينا.. والمستقبل شفناه بعنيكم.. وقفلنا ودانا وغمضنا عنينا.. وما شفنا إلا ظلام الليل ولا فجر طلع.. ولا نور النهار شقشق.. لكن مهما طالت الأيام.. هنصحى يوم من المنام.. هنكسر القيد.. هنحطم الجدران.. ولو خيرونا هنقول للقبر نعم ومليون نعم.. أما حياة الذل لأ ومليون لأ!.
أخبار متعلقة
سيد الفايد- حلوان
