قالت الفنانة سما المصري، المرشحة لانتخابات مجلس النواب، إن العبرة بما يقدمه المرشح وليس مهنته، موضحة: «مش لازم واحدة فنانة، أو فنانة استعراضية، أو حتة رقاصة عشان يبقى برلمان هز الوسط».
أخبار متعلقة
وأضافت في تصريحات خاصة لـ«المصري اليوم»: «حكاية برلمان هزّ الوسط وبرلمان على واحدة ونص والكلام ده، هو مش لازم واحدة فنانة، أو فنانة استعراضية، أو حتة رقاصة عشان يبقى برلمان هز الوسط، طيب ما إحنا شوفنا أيام برلمان الإخوان كان على واحدة واتنين وتلاتة ونص كمان.. المهازل والمساخة اللي كانت بتحصل فيه».
وتابعت: «العبرة هي هتقدم إيه أو الشخص ده هيقدم إيه، ميهمنيش هو بيشتغل إيه، جبت واحد بدقن عمل إيه؟ قعد يأذنلي في المجلس، وواحد تاني اتقفش في عربية، وواحد تاني اتقفش بمناخيره، هم دول بتوع قال الله وقال الرسول؟».
واختتمت: «لازم يدوا الفرصة للكل، والناس اللي هتحكم في الآخر، ممكن واحد يقولك دي إنسانة واضحة وباينة قدامي، ولو كانت بترقص فهي بترقص قدام الناس كلها وواضحة، فأنا أديها صوتي، وواحد تاني يقولك لا، أنا عاداتي وتقاليدي متخلنيش إن أنا أخلي النائبة بتاعتي في البرلمان تبقى واحدة استعراضية، يعني ممكن واحد يؤيد وواحد يعارض، وأنا بحترم ده وبحترم ده، وأنا قلت لو فشلت في الجولة الانتخابية دي هيبقى لي شرف التجربة».
