هاجم محمد زيدان، لاعب المنتخب وبروسيا دورتموند الألماني السابق، منتقديه بسبب دفاعه عن الرئيس الأسبق حسني مبارك، ووصفهم بألفاظ نابية.
أخبار متعلقة
وقال «زيدان» في حسابه على إنستجرام، مساء الأربعاء: «حصل في مصر في آخر أربع سنين أكتر وأسود من اللي حصل في ٣٠ سنة في عهدك، وهتفضل الأيام تثبت إنك أعظم راجل جابته مصر».
وبعد أن انهالت عليه التعليقات الرافضة لتصريحاته، قال «زيدان» صباح الخميس، إن التعليقات على الصورة «من عيال صغيرة وناس فاشلة لا معاها تعليم ولا عندها شهادة، ولا معاها صنعة ينفعوا بيها نفسهم وبلدهم، لأَنِّي متأكد إن كل واحد محترم ومتعلم صح ومعاه شهادة، مش هيكتب كومنت بالشكل ده».
وأضاف «زيدان»: «ابني آدم عنده أربع سنين وأنا من دلوقتي بعلمه يحترم غيره علشان هما كمان يحترموه، وهو دا الاحترام الصحيح، الناس بتقول ابعد عن السياسة، على فكرة رأيي في مبارك وحبي ليه ملوش علاقه بالسياسة، مبارك لا أكلني ولا شربني، أنا كونت نفسي بنفسي».
وتابع: «سافرت لوحدي وأنا عيل صغير، سبت إخواتي وحضن أهلي وأنا عيل صغير، بس رجعت بلدي بعد ما حققت حلمي، رجعتها علشان ألعب باسمها، وحققتلها إنجازات، ورفعت علمها جواها وبراها، فحبي لمبارك ملوش علاقة بأي حاجة استفدت منها من وراها».
وطالب محمد زيدان رافضي آرائه بـ«عدم متابعته»، قائلا: «الناس اللي فاكرة إن (الفولو) بيهمني فاهم غلط، أهم حاجة اللي بيتابعني يحترمني، ولو مش عاجبك الغي المتابعة».
