عارف إنتا
فى حاجات لو هحكى عنها هتبقى بايخة
قول عليها نكتة شايخة
قاعدة تتكرر فى ودنك
والكلام فاقد لمعناه الحقيقى
قول لى لو كان لفظ «ثورة» هزّ جلدك
و«الوطن» قشعر حواسك
قول لى لو كان لسه «بُكرة» ميّه فاترة..
تروى جوفك
عارف إنتا
البطل بايت فى بدنك
سايبه يتدفى بخوفك
وإن وليدك مرّة جالك
دارى عنه يا ريت كسوفك
مهما بتدارى يشوفك
نظرة مش بصالك إنتا
بصّة للبطل اللى كان مفروض يعينه
بصّة بتحاول تدينه
وأمّا يبحث البطل ده عن مرافعة
للأسف الناس بتبعد
إلا واحد هو إنتا
عارف إنتا
أو يا ريتك بُكرة تعرف
