عبر الإعلامي أحمد موسى عن إعجابه بكلمة رئيس الوزراء الفرنسي، مانويل فاليس، أمام الجمعية الوطنية، الثلاثاء، قائلًا: «أنا نفسي أبقى فرنسا».
أخبار متعلقة
وأوضح «موسى» في برنامجه «على مسؤوليتي» على قناة صدى البلد، مساء الثلاثاء: «مانويل فاليس بيتكلم قدام الجمعية الوطنية اللي هي زي البرلمان عندنا، شوفوا الراجل ده راجل دولة قعد يتكلم نص ساعة، أنا وأنا مش فرنسي صفقتله، ليه؟ بيتكلم بحرقة بقوة مبيخفش من حد، مش مرتعش، اتكلم عن دولته، واتكلم عن شعبه، قالك إيه، مسلم ومسيحي ويهودي هنحمي كل الأديان، قالك مفيش حاجة اسمها إرهاب يهدد بلدنا، ده بيتكلم عن إيه 3 إرهابيين، ماتكلمش عن 100 ألف إرهابي، الدنيا كلها وقفوا قعدوا يصقفوا».
وأضاف: «أنا وأنا مش فرنسي قعدت أسقف، قالك هنعاقب الإرهاب في كل مكان باستخبارات ولو طالت إن احنا نروح نضرب هنروح نضرب.. هو ده مواجهة الإرهاب كدة، ولا اتكلم حد على حقوق إنسان، اللي يعمل كدة لازم ننحنيله، هو أقوى من الرئيس فرنسوا هولاند».
وتابع: «احنا في مصر هنا يقولك قانون زفت اسمه قانون التظاهر، تخيلوا ناس معندهاش علاقة بالدولة، أنا بكلمكم عن دولة عظيمة حد يزايد على فرنسا والديموقراطية عندها.. دي فرنسا النهاردة.. 3 من الشرطة 3 اتعمل كدة، احنا عندنا كام وكل يوم ولسة بنفكر، بنشتغل وبنضرب أه الإرهاب، لكن لسة الناس بتنزل عندنا مظاهرات، وبينزلوا كل جمعة، ولسة كل شوية بيرفعوا رابعة، إحنا بنحارب الإرهاب بجد ولا بنهزر مع الإرهاب، أنا نفسي أبقى فرنسا، نفسي الدولة المصرية تبقى فرنسا».
