عرض الإعلامي وائل الإبراشي في برنامجه «العاشرة مساء»، الذي يذاع على قناة «دريم 2»، مقطع فيديو لمواطنة متزوجة من طبيب ذكرت أنه تم الاعتداء عليها من قبل أحد ضباط الشرطة بينما كانت في طريقها لإحضار أولادها بالسيارة من المدرسة، بالرغم حبها ودفاعها عن قوات الشرطة والقوات المسلحة.
أخبار متعلقة
وقالت السيدة، في تقرير أذاعه برنامج «العاشرة مساء»، الأربعاء، «رايحة أجيب ولادي من المدرسة فعربية حمراء من غير نمر زنقت عليا وفضلت مشيت جنبي وبعدين خبطتني في جنب.. لقيته فتح باب العربية وقعد يشتم ويزعق وأنا خايفة أنزل ومش عارفة ده بيعمل فيلم ولا مين.. وعمال يقول أنت بتشتمي ظابط وأنت بتشتمي أهلي.. أنا كله مش متخيلة الموقف وجيت أركب العربية فزق باب العربية بإيده ومش هتمشي من هنا ووريني إنت بتشتمي ضابط إزاي».
وتابعت: «أنا قلت له أنت مش متربي.. راح مد إيده من وسط الناس ولف العقد بتاعي على إيده وقعد يسحبني وكان بيحاول يخنقني بيه والناس مش قادرة أنها تخلصني منه.. ورحنا القسم نعمل محضر قالي بص بقى العربية مكنش عليها نمر وإحنا ركبنا لها نمر وأعلى ما في خيلك اركبيه.. فقلت له أنا مش هسكت أن هأوصل صوتي لأعلى مسؤول في الجمهورية إنشالله أروح لرئيس الجمهورية.. قالي أعلى ما في خيلك اركبيه ووريني هتقدري تعملي إيه في ضابط يا بنت المرة الكذا الكذا الكذا.. بمنتهى قلة الأدب أمام جوزي ونائب المأمور».
واستطردت: «كانت الطامة الكبرى أن أنت بتتشتمي ليه ويعني إيه وريني هأعمل إيه في ضابط ويعني إيه ضابط.. ضابط ده يعني إخويا يعني ابني المفروض أن إحنا كل يوم بندعي لهم وعايزينهم يقوموا تاني.. وأنا بأقول المحضر واللي المفروض ميكونش واقف جنبنا يسمع وأنا بقول المحضر تطاول عليا مرة تانية.. والنيابة طلبت كل القسم للتحقيق ولحد دلوقتي ماراحوش.. وأنا بأناشد وزير الداخلية عايزة حقي وأحس أن عندي كرامة».
