قال الكاتب الصحفي مصطفى بكري، إنه لا يعارض المصالحة بين مصر وقطر، إلا أنه يجب على قطر احترام مشاعر المصريين، فيما وصف مذيعي قناة الجزيرة المصريين بـ«الخونة».
أخبار متعلقة
وقال «بكري»، في برنامجه «حقائق وأسرار»، على قناة «صدى البلد»، مساء الخميس: «إحنا يا جماعة ماتلنا ناس، إحنا ماتلنا آلاف البشر، إحنا يا جماعة شهداؤنا في كل بيت، مين اللي قتل دول، مين المال اللي راح لجيوب الخونة والمجرمين، مش في مصر بس، في مصر وسوريا وليبيا وتونس واليمن، ولسة التمويل شغال، لا ده راح تركيا عشان تروح المجموعة هي هي تفتح قناة في تركيا، وأنا لا أفرق ما بين تركيا وبين الحكومة القطرية».
وتابع: «في لندن لسة شغالة أدواتهم وآلياتهم، بعض الناس بيقولوا خلينا يا سيدي نقفل، واحنا مش ضد ده، واحنا على ثقة كبيرة إن خادم الحرمين الشريفين وإن الرئيس عبدالفتاح السيسي لديهم جدية حقيقية في لملمة الأوضاع، وكذلك الشيخ محمد بن زايد اللي زار قطر لهذا السبب».
واستطرد: «لكن برضه على قطر أن تحترم مشاعرنا، عليها أن تدرك إن المصريين مش بقرار هيروحوا وقرار ييجوا، وإن داخل كل بيت مصري ألم وحزن شديد، وإن الدم صعب أوي يتنسي، أيًا كان الأمر وأيًا كانت حسابات السياسة، لكن جوانا فيه غصة، أربع سنين واحنا بندبح بالمال القطري، أربع سنين واحنا بنعاني، أربع سنين وهم بيآووا الخونة، سواء كانوا اللي في القناة أو الآخرين الموجودين في قطر اللي عددهم بالمئات، دول آكلين شاربين نايمين، خونة باعوا مصر وباعوا الوطن، باعونا».
